ដើម្បីវាយអក្សរនៅលើ Кeyboard ឲ្យបានលឿន វាទាមទារឲ្យអ្នកប្រើប្រាស់ម្រាមដៃទាំងអស់ ត្រូវតាមក្បួនខ្នាត។ ប៉ុន្តែវាក៏ទាមទារឲ្យអ្នកមាន បែបបទអង្គុយឲ្យបានត្រឹមត្រូវផងដែរ ទើបវាយទៅបានលឿន និងមិនសូវនឿយហត់។
ដើម្បីវាយបានលឿន សូមមើលនូវវិធីសាស្ត្រមួយចំនួន ដូចខាងក្រោម៖
១. ការអង្គុយ៖
ត្រូវអង្គុយឲ្យត្រង់ខ្លួន និងខ្នងឲ្យត្រង់។ ត្រូវដាក់កែងដៃ ឲ្យកែង៩០ដឺក្រេ កម្ពស់របស់អេក្រង់កុំព្យូទ័រត្រូវស្មើនឹងភ្នែករបស់អ្នក និងត្រូវទុកចម្ងាយយ៉ាងតិចពី ៤៥-៧០ស.ម រវាងភ្នែករបស់អ្នក និងអេក្រង់។
២. របៀបដាក់ដៃ៖
ដាក់ម្រាមដៃទាំង៨របស់អ្នក ទៅតាមអក្សរឲ្យបានត្រឹមត្រូវ ខាងឆ្វេង៤គឺ “ASDF” និងខាងស្ដាំ៤ គឺ “JKL;”។ ជួរនេះ គេហៅថា HOME ROW ព្រោះរាល់ការចាប់ផ្ដើម អ្នកតែងតែ ចាប់ផ្ដើមដោយប្រើប្រាស់ Keys ទាំងអស់នេះ។ រីឯអក្សរ F និង J ដែលមានឆ្នូតពីរបន្តិចនោះ គឺសម្រាប់ងាយស្រួលចំណាំ នៅពេលអ្នកត្រូវការស្វែងរក ដោយមិនចាំបាច់មើល។
៣. របៀបវាយ៖
ម្រាមដៃរបស់អ្នកត្រូវវាយឲ្យត្រូវនឹង Keys ហើយពេលកំពុងវាយត្រូវស្រមៃមើលទីតាំងរបស់និមិត្តសញ្ញានានា។ មេដៃទាំង២ ត្រូវដាក់លើ Key Space bar។ ដំបូងអ្នកត្រូវវាយឲ្យបានត្រឹមត្រូវសិន ទោះយឺត ក៏មិនអីដែរ។ បន្ទាប់មក ត្រូវកាត់បន្ថយការមើល Кeyboard បន្តិចម្ដងៗ រហូតដល់អាចវាយ ដោយមិនចាំបាច់មើលបាន។
៤. របៀបវាយបង្កើនល្បឿន៖
នៅពេលដែលអ្នកដាក់ដៃបានត្រឹមត្រូវស្ទាត់អស់ហើយ អ្នកអាចបង្កើនល្បឿនក្នុងការវាយបាន។ ប៉ុន្តែបើមានកំហុសច្រើន អ្នកអាចសម្រាកបន្តិចសិន បន្ទាប់មកចាំចាប់ផ្ដើមបន្តទៀត៕
សូមទស្សនា វីដេអូខាងក្រោមបន្ថែម៖
No comments:
Post a Comment